(( ياتمير غطي راس ضلعك بثوب حداد ))
الا يا عيوني واسكبي دمعك الهمال
عجزت اكتم احزانا غشتني لياليها
وياتمير غطي راس ضلعك بثوب حداد
وقولي رحل عني من الناس غاليها
وخطي على مدخل طريقك عساه السيل
عسى قبر ابو ظاهر جنان سكن فيها
رحل عنك منهو بالكرم مامعاه اثنين
رحل عنك تاريخ المواقف وماضيها
رحل شاعرا ياما كتب في غلاك ابيات
رحل عنك عنوان المراجل وراعيها
رحل عنك ابوي اللي بكته العيون بحور
ورثته القصايد عقب ماكان يرثيها
انا كيف ابصبر لاوصلت ولقيت الدار
غشاها الحزن والثوب الاسود مغطيها
وذا موتره في موقفه قد علاه غبار
تحن المراتب تشتكي فقد راعيها
وانا كيف ابصبر لادخلت وعلى يمناي
وشفت العصا ونعاله اللي مشى فيها
وذا مجلسه ياماجتمعنا معاه وفيه
واليا جا الشتاء ناره تدفي صواليها
وذي حجرته دايم الياجيت له وابغيه
الاقيه فيها جالس ما يخليها
وذا ثوبه معلق وذي غترته بالباب
وذي سبحته عقبه بكت من يسليها
ولقيت امي اللي قد علاها الحزن تبكيه
وفي عينها دمعا على الخد ماليها
مضى لي سنه وانا اتحرى بيوم القاه
وجته المنيه واسبقت بامر واليها
وانا في ديار الروس بعيدا بي المسفار
ونفسي تكفخ ياهلي من يوديها
ابحضر صلاته والجنازه ودفنه ليت
على قبره اذرف من عيوني بصافيها
ويالله ياعالم بحزني ومافي القلب
تهون على روحا بكت فقد غاليها
وعسى مسكنه جنات خلد مع الابرار
مع المصطفي واللي برحتمك واطيها
|
(( ياتمير غطي راس ضلعك بثوب حداد ))
ارسل القصيدة لصديق
طباعة القصيدة 
حفظ القصيدة كملف Word
حفظ القصيدة كملف PDF
